നീതിക്കുവേണ്ടി ദാഹിക്കുന്നവര്‍ക്ക് ബദ്ര്‍ ഒരിക്കലും കെട്ടടങ്ങാത്ത ആവേശമാണ്.
ജീവന്‍ വിലയായികൊടുത്തും സ്ഥാപിതമാക്കേണ്ട ദൈവികഗുണമാണ് ഒരു വ്യക്തിയെ സംബന്ധിച്ചേടത്തോളം നീതി.
നീതിയിൽ നിലകൊള്ളുന്നവനാകുക എന്നത് ലോകത്തിന്റെ നിലനില്‍പ്പിനെ സാധ്യമാക്കുന്ന അച്ചുതണ്ടിന്റെ പേരാണത്.
എന്തിനാണ് ബദ്ര്‍ എന്ന ചോദ്യത്തിന് ഖുര്‍ആന്‍ നല്‍കുന്ന ഉത്തരം ഏതൊരു വിഭാഗത്തിന്റെയും നീതി തകര്‍ക്കപ്പെടാതിരിക്കാന്‍ എന്നാണ്.
ആദര്‍ശ വിയോജിപ്പുകള്‍ മനുഷ്യരുടെ അവകാശങ്ങള്‍ സംരക്ഷിക്കപ്പെടാതിരിക്കാന്‍ കാരണമല്ല. ദൈവത്തെക്കുറിച്ചുള്ള വ്യക്തികളുടെ വിശ്വാസം തെറ്റായിരിക്കെത്തന്നെ, അത് വിശ്വസിക്കാനുള്ള സ്വാതന്ത്ര്യം ദൈവ പ്രോക്തമാണ്. വ്യക്തി സംരക്ഷിക്കപ്പെടുക എന്നതാണ് ഭൂമിയിലെ ദൈവ നീതി. ആ നീതിയുടെ സംസ്ഥാപനത്തിനും സംരക്ഷണത്തിനും വേണ്ടി നിലകൊള്ളാന്‍ ബാധ്യതപ്പെട്ടവരാണ് വിശ്വാസികള്‍.
വിശ്വാസ വൈജാത്യങ്ങള്‍ മനുഷ്യന്റെ അവകാശങ്ങളുടെ കൈയേറ്റത്തിന് കാരണമാവരുത്.
ഒരു വ്യക്തി തന്റെ ഉത്തരവാദിത്വ നിര്‍വഹണത്തെക്കുറിക്കാനാണ് 'അല്ലാഹുവിനെ സഹായിക്കുക' എന്ന പ്രയോഗം ഖുര്‍ആന്‍ നടത്തുന്നത്.
ഒരു വിശ്വാസിയെ സംബന്ധിച്ചേടത്തോളം ഒരാരാധനയിലൂടെയും നേടിയെടുക്കാനാവാത്ത ആത്മീയമായ ഏറ്റവും ഉയര്‍ന്ന പദവിയാണ് 'അല്ലാഹുവിന്റെ സഹായി' എന്നത്.
സന്മാര്‍ഗത്തിന്റെ പ്രബോധനവും നീതിയുടെ സംസ്ഥാപനവുമാണ് മനുഷ്യന്റെ നിയോഗ ലക്ഷ്യം.
എല്ലാ സമൂഹങ്ങളുടെയും അവകാശ സ്വാതന്ത്ര്യത്തിന്റെ സംരക്ഷണം പരസ്പര ബന്ധിതമാണ്.
നീതി പുലരുക എന്നു പറയുന്നതിന്റെ അര്ഥം അവകാശ സ്വാതന്ത്ര്യം പുലരുക എന്നതാണ്.
നീതി എന്നത് മാനവികതയെയാണ് പ്രകാശിപ്പിക്കുന്നത്.
എല്ലാവര്‍ക്കുമായി ഒരു സ്വാതന്ത്ര്യം മാത്രമേയുള്ളൂ എന്നതാണ് ദൈവികമായ സത്യം. ഇത് ദൈവത്തിന്റെ ആളുകള്‍ പോലും മറന്നുപോവുന്നു എന്നതാണ് ദുഃഖസത്യം. അതുകൊണ്ടുതന്നെയാണ് പലപ്പോഴും നീതിപുലരാതെ പോവുന്നതും.
മനുഷ്യൻ ഭൂമിയിലെ നീതിയുടെ കാവല്‍ക്കാരാണ്. അവര്‍ ഐക്യപ്പെടേണ്ടത് ഭുമിയില്‍ അനീതിയും അതിക്രമവും അവസാനിപ്പിക്കാന്‍ അനിവാര്യമാണെന്ന് ഖുര്‍ആന്‍ പറയുന്നു, അഥവാ അവര്‍ ശിഥിലരായാല്‍ അവര്‍ക്ക് നാശനഷ്ടങ്ങള്‍ ഉണ്ടാകുമെന്ന് മാത്രമല്ല അല്ലാഹു പറയുന്നത്. വിരുദ്ധ ശക്തികള്‍ അവരുടെ വഴിയില്‍ ഒറ്റകെട്ടാണ്. നിങ്ങള്‍ ശിഥിലരായാല്‍ ഭൂമിയില്‍ വലിയ ഫിത്‌നയും ഫസാദും ഉണ്ടാകുമെന്നാണ് ഖുര്‍ആന്‍ പറയുന്നത്.
ഫസാദുകളെ തടഞ്ഞുനിര്‍ത്താന്‍ ബാധ്യതപ്പെട്ട ഒരു സമൂഹം അത് യഥാവിധി നിര്‍വഹിക്കാതിരിക്കുമ്പോഴാണ് ലോകത്ത് മര്‍ദനങ്ങളും അതിക്രമങ്ങളും കൊടികുത്തിവാഴുന്നത്.
സ്വന്തം സ്വഭാവവും സംസ്‌കാരവും മൂല്യങ്ങളും ഖുർആന്റെ അധ്യാപനങ്ങളാല്‍ ഉടച്ചുവാര്‍ക്കാത്തേടത്തോളം കാലം ഒരുവന്റെ സത്യസാക്ഷ്യം പൂര്‍ണമാകുന്നില്ല.
സത്യസന്ധത, വിശ്വസ്തത, ഋജുമാനസത, ദുര്‍ബലനോടുള്ള ആര്‍ദ്രത, കരാര്‍ പാലനം തുടങ്ങിയ ഉന്നത ജീവിതമൂല്യങ്ങള്‍ ഖുർആനിൽഅള്ളാഹു പറഞ്ഞതും പ്രവാചകൻഅനുവർത്തിചതുമായ കാര്യങ്ങൾ നമ്മുടെ ജീവിതത്തിലും നഷ്ടപ്പെടാതെ കാത്തുസൂക്ഷിക്കേണ്ടതുണ്ട്.
No comments:
Post a Comment